Apporteringstrening og spor.

I dag møttes vi på området for å trene apportering/ feltsøk.

Eg tok ut dummien i dag. Veit ikkje heilt kor smart det var. Det er lenge sidan han har brukt den og sist rota han veldig i feltet. Men altså eg tok den...
Ekko sprang fint ut, tok dummien og hadde tenkt seg ein heilt annan plass enn inn til meg med den.
Bytta den ut med apportbukken. Det gjekk litt betre, men eg syns han hadde altfor mykje av seiersrunde før han kom inn.
Dette er andre gong eg har slik start. Eg må nok gjere noko med starten slik at han landar og er klar for jobbing FØR han startar apporteringa.

Andre økta var ein annan hund. No kunne han sitje og vente medan eg gjekk ut med apporten. Han sprang kjapt ut, henta og leverte fint. Premien var å få leike. Stødige og fine alle apporteringane i denne økta.

Tredje økt fekk han ein hanske og ein apportbukk som utfordring. Apportbukken hamna òg i høgt gras slik at han måtte langt ut. Første gang hansken blei tatt opp, ville han avgarde med den, men ein stopplyd var nok til at han snudde kjapt og kom inn og leverte. Etter det gjekk hansken som smurt.
Å leike etter at han hadde levert to var kjempekjekt. Særleg når eg tok leika sakte ut og gjorde det spennande. Heile han dirra.

Nå må eg altså trene på å vere klar på første økt, mindre og meir skjulte gjenstandar må nok òg med. Her imponerte Pia. Ho leita lenge før ho fann klikkaren Silje hadde lagt ut. Men ho fann den og inn kom den (heil!).

Vi avslutta denne gongen, som alltid, fellestreninga med ein runde i hinderløypa. Veldig kjekt.

Jan Inge hadde lagt ut eit spor for meg. No hadde det godgjort seg i 3 timar. Det var spennande for meg å gå eit spor eg ikkje visst kor gjekk. Ekko tok sporstarten fort. Han gjekk stødig, litt fort for meg av og til ( eg brukte den vanlege lina, burde nok hatt langline på grunn av terrenget), men stort sett greidde eg fint å følge han. Eg hadde fått vite kor det var lagt inn ein vinkel. Ekko gjekk kanskje ein liten halvmeter forbi (maks) før han såg opp, snudde og fulgte vinkelen. Resten av løypa såg eg bare opp av og til for å få bekrefta av merka at vi var på rett spor. Og det var vi kvar gong.
Eit veldig kjekt spor å gå, ein sikker hund i sporet - ja det var fin avslutning. Takk Jan Inge for eit flott spor!