Språkkurs - del 1

Endeleg fekk eg òg med meg det berømte språkkurset til Arne i Siddis hundeskole. Fleire gonger har eg prøvd å få det med meg, men alltid la dei kursa i helger eg ikkje kunne. Men denne gongen.... Eg fekk ikkje med meg teorien på fredagen, men eg reknar med at mykje av det var kjent stoff.

Laurdagen starta med litt meir teori om ka vi kan sjå viss vi lærer oss å lese hunden. Vi fekk sjå fleire opptak av hundar i helsesituasjonar, både med menneske og dyr.
Og så var det tispene sin tur. No skulle vi opp på taket på Jærhagen og la to og to hundar møtast. Dette blei både filma og fotografert. Eg blei heilt fascinert av ei grå grand danoir tispe på 7-8 mnd. Ho såg til tider nesten ut som bambi på isen. Men med all denne kroppen, hadde ho eit godt språk og kunne lese dei andre tispene.

Vi hadde òg ein runde med at hundane fekk helse på 1 og 1 person.

Det var spennande å sjå på film og til tider i sakte kino ka som skjedde mellom hundane. Ka signal dei sendte ut, koss den andre reagerte osb. Utruleg kor stivt og stille dei går for ikkje å forstyrre den andre i snusinga i baken og andre aktuelle stader. I følge Bente så søkjer dei "inside information" ;).

Litt teori:
Hundane bruker mykje kroppen sin til å formidle. Kroppsspråket; lyd, kroppskontakt, lukt. Dei bruker språket til å samarbeide (?) (vi veit eigentleg ikkje), unngå konfliktar, fjerne/ halde unna konkurrentar, fjerne/ halde unna truande individ, fortelje at dei er venlege eller at dei vil halde avstand osb.
Dominans:
Ingen hundar er pr definisjon dominante, men det er settingen som gjer dette naudsynt: Rangordning i konkurransesituasjon (mat), rangordning blant dei som lever saman. MEN då er det ikkje snakk om menneske - dyr, bare dyr av same kjønn.
Kvelpar er underdanige  i forhold til foreldre og eldre dyr (men for eit tolmod vaksne dyr har med kvelpar..)

Dempande signal:
Rolege bevegelsar, sjå bort, frys, snuse osb....

Avstandssignal:
blåse seg opp, lage lyd (knurring), vise tenner, stirre osb...

Språket til hunden kan fortelje oss om den er trygg, usikker/redd, offensiv, defensiv, ka det kan forventast at den kjem til å gjere, om den ønskjer kontakt, om den har det bra...

Aggresjon:
Ingen hundar er aggressive, men dei kan setjast i ein situasjon som gjer dei til det: Forsvar av seg sjølv, forsvar av ressursar (mat, pinne..), redsel. For å få ein redd hund til å fungere må vi setje i gang tiltak mot redsla, ikkje bare det ytre skal slik ein viss Tv-kjendis gjer. (skulle så gjerne hatt den videosnutten der C. Milan lærer hunden å gå med halen opp. Kan ein eller annan gje meg lenkja?). Faren ved bare å fjerne det ytre, til dømes knurringa når han er redd, er at angrepet kjem utan knurring neste gong.

Dette var kort. Turid Rugås har skrive veldig bra om dette. Eg skal kome tilbake til litteratur i neste innlegg for då skal eg ta for meg Ekko sine møte med ukjent hundar. Vil bare ha bileta frå Bente B. før det.

Det var ekstra spennande at vi fekk sjå alt to gonger med ulikt videokamera. Dei gongene det blei konflikt var det mest lyd og alt gjekk fort over. Filminga av møtet med menneske var òg spennande. At det så tydeleg viser kor lite/stor interesse dei har for menneske og kor mykje rart vi gjer i slike situasjonar, er eit studie verd.

Nedanfor litt situasjonar frå tispedagen på laurdagen. Eg sit på lang avstand og har ikkje god zoom så det er kanskje litt uklart når  eg har forstørra det så mykje opp som det eg har gjort. PS: Bileta av hundane er i rekkefølge.